ਸਾਡੇ ਗਾਹਕਾਂ ਲਈ ਕਸਟਮਰ ਸਰਿਵਸ ਦੇ ਨਿਯਮ

ਅਸੀਂ ਤੁਹਾਡੇ ਲਈ ਸਾਡੇ ਨਾਲ ਬਿਜ਼ਨਸ ਕਰਨ ਨੂੰ ਸੌਖਾ ਬਣਾਉਣ ਲਈ ਆਪਣੀ ਪੂਰੀ ਵਾਹ ਲਾਉਂਦੇ ਹਾਂ। ਇਹ ਕੁਝ ਮੁੱਖ ਚੀਜ਼ਾਂ ਹਨ ਜਿਹੜੀਆਂ ਸਾਡੇ ਖਿਆਲ ਮੁਤਾਬਕ ਤੁਹਾਨੂੰ ਬੀ ਸੀ ਹਾਈਡਰੋ ਦੇ ਇਕ ਗਾਹਕ ਵਲੋਂ ਜਾਣਨੀਆਂ ਚਾਹੀਦੀਆਂ ਹਨ।

ਜਦੋਂ ਤੁਸੀਂ ਆਪਣਾ ਖਾਤਾ ਬਣਾਉਂਦੇ ਹੋ ਜਾਂ ਮੂਵ ਕਰਦੇ ਹੋ

ਬਿਜਲੀ ਦੀ ਸਰਵਿਸ ਵਿਚ ਕਿਸੇ ਵਿਘਨ ਤੋਂ ਬਚਣ ਲਈ, ਆਪਣੀ ਪ੍ਰਾਪਰਟੀ ਵਿਚ ਮੂਵ ਹੋਣ ਤੋਂ ਪਹਿਲਾਂ ਹੀ ਆਪਣਾ ਖਾਂਤਾ ਬਣਾ ਲਉ। ਪਹਿਲੇ ਖਾਂਤੇ ਵਾਲੇ ਵਿਅਕਤੀ ਦੇ ਚਲੇ ਜਾਣ ਤੋਂ ਬਾਅਦ ਜੇ ਕੋਈ ਸਰਵਿਸ ਲਈ ਅਪਲਾਈ ਨਹੀਂ ਕਰਦਾ ਤਾਂ ਅਸੀਂ ਬਿਜਲੀ ਕੱਟ ਦਿੰਦੇ ਹਾਂ।

ਤੁਸੀਂ ਸਿਰਫ ਆਪਣੇ ਨਾਂ `ਤੇ ਖਾਤਾ ਬਣਾ ਸਕਦੇ ਹੋ (ਜੇ ਬਿਜ਼ਨਸ ਖਾਤਾ ਖੋਲ੍ਹ ਰਹੇ ਹੋ ਤਾਂ ਤੁਹਾਡੇ ਬਿਜ਼ਨਸ ਦੇ ਪੂਰੇ ਕਾਨੂੰਨੀ ਨਾਂ `ਤੇ), ਅਤੇ ਤੁਹਾਨੂੰ ਸਾਨੂੰ ਆਪਣੀ ਪਛਾਣ ਦੇ ਸਹੀ ਪੱਤਰ ਅਤੇ ਰੈਫਰੈਂਸ ਦੇ ਪੇਪਰ ਦੇਣ ਦੀ ਲੋੜ ਪਵੇਗੀ।

ਨਵਾਂ ਖਾਤਾ ਖੋਲ੍ਹਣ ਬਾਰੇ ਜ਼ਿਆਦਾ ਜਾਣੋ ਜਾਂ ਆਪਣੀ ਪ੍ਰਾਪਰਟੀ `ਤੇ ਬਿਜਲੀ ਦਾ ਨਵਾਂ ਕੋਨੈਕਸ਼ਨ ਲਗਾਏ ਜਾਣ ਲਈ ਬੇਨਤੀ ਕਰਨ ਬਾਰੇ ਜਾਣੋ।

ਤੁਹਾਡੇ ਕਬਜ਼ੇ ਹੇਠਲੀ ਕਿਸੇ ਵੀ ਪ੍ਰਾਪਰਟੀ `ਤੇ ਵਰਤੀ ਗਈ ਬਿਜਲੀ ਦਾ ਬਿਲ ਦੇਣ ਲਈ ਤੁਸੀਂ ਜ਼ਿੰਮੇਵਾਰ ਹੋ। ਇਹ ਲਾਗੂ ਹੁੰਦਾ ਹੈ ਭਾਵੇਂ ਸਰਵਿਸ ਦੇ ਐਗਰੀਮੈਂਟ `ਤੇ ਦਸਖਤ ਨਹੀਂ ਹੋਏ ਜਾਂ ਇਹ ਤੁਸੀਂ ਨਹੀਂ ਹੋ ਜੋ ਪ੍ਰਾਪਰਟੀ `ਤੇ ਬਿਜਲੀ ਦੀ ਵਰਤੋਂ ਕਰ ਰਹੇ ਹੋ। ਅਜਿਹਾ ਕਦੋਂ ਹੋ ਸਕਦਾ ਹੈ, ਇਸ ਦੀਆਂ ਕੁਝ ਉਦਾਹਰਣਾਂ ਵਿਚ ਇਹ ਸ਼ਾਮਲ ਹਨ:

• ਤੁਸੀਂ ਘਰ ਵਿਚ ਮੂਵ ਹੋ ਜਾਂਦੇ ਹੋ ਪਰ ਘਰ ਵਿਚ ਕਈ ਦਿਨ ਰਹਿਣ ਤੋਂ ਬਾਅਦ ਆਪਣਾ ਖਾਤਾ ਖੋਲ੍ਹਦੇ ਹੋ। ਇਸ ਸੂਰਤ ਵਿਚ, ਤੁਹਾਡੇ ਮੂਵ ਹੋ ਕੇ ਆਉਣ ਤੋਂ ਲੈ ਕੇ ਪ੍ਰਾਪਰਟੀ ਵਿਚ ਵਰਤੀ ਗਈ ਬਿਜਲੀ ਦਾ ਖਰਚਾ ਦੇਣ ਦੀ ਜ਼ਿੰਮੇਵਾਰੀ ਅਜੇ ਵੀ ਤੁਹਾਡੀ ਹੋਵੇਗੀ।
• ਤੁਸੀਂ ਕਿਰਾਏ ਵਾਲੀ ਕਿਸੇ ਉਸ ਪ੍ਰਾਪਰਟੀ ਦੇ ਮਾਲਕ ਹੋ ਜਾਂ ਉਸ ਨੂੰ ਮੈਨੇਜ ਕਰਦੇ ਹੋ ਜਿਹੜੀ ਖਾਲੀ ਹੈ, ਪਰ ਕੁਝ ਬਿਜਲੀ ਅਜੇ ਵੀ ਵਰਤ ਹੋ ਰਹੀ ਹੈ (ਜਿਵੇਂ ਕਿ ਹੀਟਿੰਗ ਜਾਂ ਫਰਿੱਜਾਂ ਦੇ ਸਿਸਟਮਾਂ ਲਈ)। ਇਸ ਸੂਰਤ ਵਿਚ, ਵਰਤ ਹੋਈ ਬਿਜਲੀ ਦਾ ਖਰਚਾ ਦੇਣ ਦੀ ਜ਼ਿੰਮੇਵਾਰੀ ਤੁਹਾਡੀ ਹੋਵੇਗੀ।

ਜੇ ਤੁਹਾਡੇ ਵੱਲ ਪਹਿਲਾਂ ਬੰਦ ਕੀਤੇ ਗਏ ਕਿਸੇ ਖਾਤੇ ਦਾ ਬਕਾਇਆ ਰਹਿੰਦਾ ਹੋਵੇ ਤਾਂ ਬਕਾਇਆ ਰਕਮ ਤੁਹਾਡੇ ਨਵੇਂ ਖਾਤੇ `ਤੇ ਤਬਦੀਲ ਕਰ ਦਿੱਤੀ ਜਾਵੇਗੀ।

ਕਿਰਪਾ ਕਰਕੇ ਇਹ ਗੱਲ ਨੋਟ ਕਰੋ ਕਿ ਬੀ ਸੀ ਹਾਈਡਰੋ ਨਾਲ ਆਪਣੇ ਨਾਂ `ਤੇ ਖਾਤਾ ਖੋਲ੍ਹਣ ਲਈ ਤੁਹਾਡਾ ਘੱਟੋ ਘੱਟ 19 ਸਾਲ ਦੀ ਉਮਰ ਦੇ ਹੋਣਾ ਜ਼ਰੂਰੀ ਹੈ।

ਬਿਜਲੀ ਦੇ ਰੇਟ

ਤੁਹਾਡੇ ਖਾਤੇ ਲਈ ਜਿਹੜਾ ਰੇਟ ਅਸੀਂ ਵਰਤਾਗੇ ਉਹ ਇਸ ਚੀਜ਼ `ਤੇ ਨਿਰਭਰ ਹੋਵੇਗਾ ਕਿ ਤੁਸੀਂ ਬਿਜਲੀ ਕਿਵੇਂ ਵਰਤਦੇ ਹੋ। ਪ੍ਰਾਪਰਟੀ ਦੀ ਕਿਸਮ, ਤੁਹਾਡੀ ਪ੍ਰਾਪਰਟੀ `ਤੇ ਬਿਜਲੀ ਦੀ ਵਰਤੋਂ ਦਾ ਮਕਸਦ, ਅਤੇ ਤੁਸੀਂ ਕਿੰਨੀ ਬਿਜਲੀ ਵਰਤਦੇ ਹੋ, ਉਹ ਪੱਖ ਹਨ ਜਿਹੜੇ ਤੁਹਾਡੇ ਰੇਟ ਦਾ ਫੈਸਲਾ ਕਰਨ ਲਈ ਵਰਤੇ ਜਾ ਸਕਦੇ ਹਨ।

• ਜੇ ਤੁਸੀਂ ਘਰ ਵਿਚ ਰਹਿੰਦੇ ਹੋ ਅਤੇ ਬਿਜਲੀ ਦੀ ਵਰਤੋਂ ਪੂਰੀ ਤਰ੍ਹਾਂ ਰਿਹਾਇਸ਼ੀ ਮੰਤਵਾਂ ਲਈ ਕਰਦੇ ਹੋ ਤਾਂ ਤੁਹਾਨੂੰ ਰਿਹਾਇਸ਼ੀ (ਰੈਜ਼ੀਡੈਂਸ਼ਲ) ਰੇਟ `ਤੇ ਰੱਖਿਆ ਜਾਵੇਗਾ।
• ਜੇ ਤੁਸੀਂ ਘਰ ਵਿਚ ਰਹਿੰਦੇ ਹੋ ਅਤੇ ਤੁਹਾਡੇ ਘਰ ਵਿਚ ਕੋਈ ਬਿਜ਼ਨਸ ਹੈ ਤਾਂ ਤੁਹਾਨੂੰ ਬਿਜ਼ਨਸ ਰੇਟ `ਤੇ ਰੱਖਿਆ ਜਾ ਸਕਦਾ ਹੈ।

ਸਾਡੇ ਰੇਟਾਂ ਬਾਰੇ ਜ਼ਿਆਦਾ ਜਾਣੋ।

ਖਾਤਾ ਖੋਲ੍ਹਣ ਲਈ ਜਦੋਂ ਤੁਸੀਂ ਸਾਡੇ ਨਾਲ ਸੰਪਰਕ ਕਰਦੇ ਹੋ ਤਾਂ ਤੁਹਾਨੂੰ ਸਾਨੂੰ ਇਹ ਦੱਸਣ ਦੀ ਲੋੜ ਪਵੇਗੀ ਕਿ ਆਪਣੀ ਪ੍ਰਾਪਰਟੀ `ਤੇ ਤੁਸੀਂ ਬਿਜਲੀ ਦੀ ਵਰਤੋਂ ਕਿਵੇਂ ਕਰੋਗੇ ਤਾਂ ਜੋ ਅਸੀਂ ਤੁਹਾਡੇ ਖਾਤੇ ਲਈ ਸਭ ਤੋਂ ਢੁਕਵਾਂ ਰੇਟ ਚੁਣ ਸਕੀਏ। ਆਪਣੇ ਰੇਟ ਨੂੰ ਸਮਝਣਾ, ਆਪਣੇ ਬਿਜਲੀ ਦੇ ਖਰਚਿਆਂ ਨੂੰ ਬਿਹਤਰ ਕੰਟਰੋਲ ਕਰਨ ਅਤੇ ਬੇਲੋੜੇ ਚਾਰਜਾਂ ਤੋਂ ਬਚਣ ਵਿਚ ਤੁਹਾਡੀ ਮਦਦ ਕਰ ਸਕਦਾ ਹੈ।

ਸਕਿਉਰਟੀ ਡਿਪਾਜ਼ਿਟ

ਸਕਿਉਰਟੀ ਡਿਪਾਜ਼ਿਟ ਉਨ੍ਹਾਂ ਨੁਕਸਾਨਾਂ ਅਤੇ ਖਰਚਿਆਂ ਨੂੰ ਸੀਮਤ ਕਰਨ ਦਾ ਇਕ ਤਰੀਕਾ ਹੈ ਜਿਹੜੇ ਉਦੋਂ ਹੁੰਦੇ ਹਨ ਜਦੋਂ ਗਾਹਕ ਆਪਣੇ ਬਿਲ ਨਹੀਂ ਦਿੰਦੇ।

ਇਕ ਨਵੇਂ ਗਾਹਕ ਵਜੋਂ ਜਾਂ ਇਕ ਅਜਿਹੇ ਗਾਹਕ ਵਜੋਂ ਜਿਸ ਨੇ ਆਪਣੀ ਚੰਗੀ ਪੇਮੈਂਟ ਦੀ ਹਿਸਟਰੀ ਕਾਇਮ ਨਹੀਂ ਰੱਖੀ ਹੈ, ਤੁਹਾਡੇ ਤੋਂ ਸਕਿਉਰਟੀ ਡਿਪਾਜ਼ਿਟ ਲਿਆ ਜਾ ਸਕਦਾ ਹੈ।

ਕੁਝ ਬਦਲ ਹਨ ਜਿਹੜੇ ਤੁਹਾਨੂੰ ਸਕਿਉਰਟੀ ਡਿਪਾਜ਼ਿਟ ਦੀ ਮੰਗ ਤੋਂ ਛੋਟ ਦਿਵਾ ਸਕਦੇ ਹਨ:

ਕਰੈਡਿਟ ਬਿਊਰੋ ਦੀ ਰਿਪੋਰਟ – ਤੁਹਾਡੇ ਕਰੈਡਿਟ ਦੀ ਉੱਤਮਤਾ ਦੀ ਤਸਦੀਕ ਕੀਤੇ ਜਾਣ ਲਈ ਸਾਨੂੰ ਕਰੈਡਿਟ ਬਿਊਰੋ ਤੋਂ ਤੁਹਾਡੀ ਰਿਪੋਰਟ ਲੈਣ ਦੀ ਆਗਿਆ ਦਿਉ। ਜੇ ਤੁਹਾਡੇ ਕਰੈਡਿਟ ਦੀ ਰਿਪੋਰਟ ਚੰਗੀ ਕਰੈਡਿਟ ਹਿਸਟਰੀ ਦਿਖਾਉਂਦੀ ਹੋਵੇ ਤਾਂ ਅਸੀਂ ਤੁਹਾਨੂੰ ਸਕਿਉਰਟੀ ਡਿਪਾਜ਼ਿਟ ਤੋਂ ਛੋਟ ਦੇ ਸਕਦੇ ਹਾਂ।

ਰੈਫਰੈਂਸ ਲੈਟਰ (ਚਿੱਠੀ) – ਕਿਸੇ ਹੋਰ ਯੂਟਿਲਟੀ ਤੋਂ ਕਰੈਡਿਟ ਰੈਫਰੈਂਸ ਲੈਟਰ ਦੀ ਕਾਪੀ ਦਿਉ, ਜਿਵੇਂ ਕਿ ਕਰੈਡਿਟ ਦੀ ਉੱਤਮਤਾ ਦੀ ਤਸਦੀਕ ਕਰਨ ਵਾਲੀ ਕਿਸੇ ਹੋਰ ਸੂਬੇ ਤੋਂ।

ਖਾਤੇ ਦੀ ਗਰੰਟੀ – ਜੇ ਤੁਸੀਂ ਰਿਹਾਇਸ਼ੀ ਗਾਹਕ ਹੋ, ਤਾਂ ਤੁਸੀਂ ਬੀ ਸੀ ਹਾਈਡਰੋ ਦੇ ਕਿਸੇ ਹੋਰ ਗਾਹਕ ਤੋਂ ਆਪਣੇ ਖਾਤੇ ਦੀ ਗਰੰਟੀ ਦਿਵਾ ਸਕਦੇ ਹੋ। ਜੇ ਖਾਤੇ ਦੇ ਬੰਦ ਹੋ ਜਾਣ ਤੋਂ ਬਾਅਦ ਕੋਈ ਬਕਾਇਆ ਰਹਿੰਦਾ ਹੋਵੇ ਤਾਂ ਗਰੰਟੀ ਦੇਣ ਵਾਲਾ ਸਕਿਉਰਟੀ ਡਿਪਾਜ਼ਿਟ ਦੀ ਰਕਮ ਦੇ ਬਰਾਬਰ ਦੀ ਰਕਮ ਅਦਾ ਕਰੇਗਾ। ਬੀ ਸੀ ਹਾਈਡਰੋ ਦਾ ਖਾਤਾ ਗਰੰਟੀ ਫਾਰਮ ਦਰਜ ਕਰਵਾਉ {ਪੀ ਡੀ ਐੱਫ 58 ਕੇ ਬੀ}।

ਪੇਅ ਐਜ਼ ਯੂ ਗੋ ਪਲੈਨ – ਜੇ ਤੁਸੀਂ ਰਿਹਾਇਸ਼ੀ ਗਾਹਕ ਹੋ ਤਾਂ ਤੁਸੀਂ ਪੇਅ ਐਜ਼ ਯੂ ਗੋ ਪਲੈਨ (ਯੋਜਨਾ ਦੇ ਅਨੁਸਾਰ ਭੁਗਤਾਨ ਕਰੋ) ਦੀ ਚੋਣ ਕਰ ਸਕਦੇ ਹੋ। ਬਿਲ ਪੱਕੀਆਂ ਮਹੀਨਾਵਾਰ ਕਿਸ਼ਤਾਂ ਜਮ੍ਹਾਂ ਇਕ ਮੁਢਲੀ ਪੇਮੈਂਟ (ਜੋ ਕਿ ਅਡਵਾਂਸ ਲਈ ਜਾਂਦੀ ਹੈ) ਦੇ ਆਧਾਰ `ਤੇ ਹੁੰਦਾ ਹੈ। ਇਸ ਮੁਢਲੀ ਪੇਮੈਂਟ ਦਾ ਹਿਸਾਬ, ਤੁਹਾਡੇ ਸਥਾਨ `ਤੇ ਪਿਛਲੇ 12 ਮਹੀਨਿਆਂ ਲਈ ਬਿਜਲੀ ਦੀ ਵਰਤੋਂ ਦੇ ਔਸਤ ਖਰਚੇ ਦੇ ਆਧਾਰ `ਤੇ ਲਗਾਇਆ ਜਾਂਦਾ ਹੈ।

ਜਿਨ੍ਹਾਂ ਗਾਹਕਾਂ ਦੇ ਬਿਲ ਸਿੱਧੇ ਬੀ ਸੀ ਸੂਬੇ ਦੀ ਮਨਿਸਟਰੀ ਔਫ ਸੋਸ਼ਲ ਡਿਵੈਲਪਮੈਂਟ ਐਂਡ ਸੋਸ਼ਲ ਇਨੋਵੇਸ਼ਨ (ਐੱਮ ਐੱਸ ਡੀ ਐੱਸ ਆਈ) ਵਲੋਂ ਦਿੱਤੇ ਜਾਂਦੇ ਹਨ, ਉਨ੍ਹਾਂ ਤੋਂ ਸਕਿਉਰਟੀ ਡਿਪਾਜ਼ਿਟ ਦੇਣ ਦੀ ਮੰਗ ਨਹੀਂ ਕੀਤੀ ਜਾਂਦੀ।

ਅਸੀਂ ਡਿਪਾਜ਼ਿਟ ਦੀ ਰਕਮ ਦਾ ਹਿਸਾਬ, ਪ੍ਰਾਪਰਟੀ `ਤੇ ਪਿਛਲੇ ਸਮੇਂ ਵਿਚ ਬਿਜਲੀ ਦੀ ਵਰਤੋਂ ਅਤੇ ਇਸ ਆਧਾਰ `ਤੇ ਲਗਾਉਂਦੇ ਹਾਂ ਕਿ ਤੁਹਾਨੂੰ ਬਿਲ ਕਿੰਨੀ ਵਾਰੀ ਮਿਲਦਾ ਹੈ।

ਤੁਹਾਨੂੰ ਸਕਿਉਰਟੀ ਡਿਪਾਜ਼ਿਟ ਉੱਪਰ ਵਿਆਜ ਮਿਲੇਗਾ, ਜੋ ਕਿ ਹਰ ਬਿਲ ਵਿਚ ਤੁਹਾਡੇ ਖਾਤੇ ਵਿਚ ਕਰੈਡਿਟ ਦੇ ਤੌਰ `ਤੇ ਦਿੱਤਾ ਜਾਵੇਗਾ। ਵਿਆਜ ਦੀ ਆਮਦਨ ਤੁਹਾਡੀ ਟੈਕਸ ਰਿਟਰਨ `ਤੇ ਕੈਨੇਡਾ ਰੈਵੇਨਿਊ ਏਜੰਸੀ ਨੂੰ ਰਿਪੋਰਟ ਕਰਨ ਯੋਗ ਹੈ। ਜੇ ਵਿਆਜ ਦਾ ਕਰੈਡਿਟ ਤੁਹਾਡੇ ਖਾਤੇ ਵਿਚ $50 ਨਾਲੋਂ ਜ਼ਿਆਦਾ ਹੁੰਦਾ ਹੈ ਤਾਂ ਅਸੀਂ ਫਰਵਰੀ ਦੇ ਅੰਤ `ਤੇ ਤੁਹਾਨੂੰ ਟੀ 5 ਭੇਜਾਂਗੇ।

ਚੰਗੀ ਪੇਮੈਂਟ ਹਿਸਟਰੀ ਦੇ ਦੋ ਸਾਲਾਂ ਬਾਅਦ ਸਕਿਉਰਟੀ ਡਿਪਾਜ਼ਿਟ ਤੁਹਾਨੂੰ ਵਾਪਸ ਕੀਤਾ ਜਾ ਸਕਦਾ ਹੈ।

ਆਪਣਾ ਬਿਲ ਦੇਣਾ

ਬਿਲ ਭੇਜਣ ਦੀ ਤਾਰੀਕ ਤੋਂ ਬਾਅਦ ਤੁਹਾਡੇ ਬਿਲ ਦੀ ਪੂਰੀ ਰਕਮ ਦੀ ਪੇਮੈਂਟ 21 ਦਿਨਾਂ ਦੇ ਵਿਚ ਵਿਚ ਕਰਨਾ ਜ਼ਰੂਰੀ ਹੈ। ਭੁਗਤਾਨ ਕਰਨ ਦੀ ਤਾਰੀਕ ਤੋਂ ਬਾਅਦ ਰਹਿੰਦੇ ਕਿਸੇ ਵੀ ਬਕਾਏ ਉੱਪਰ ਲੇਟ ਪੇਮੈਂਟ ਚਾਰਜ ਲੱਗ ਸਕਦੇ ਹਨ। ਇਹ ਲਾਗੂ ਹੁੰਦਾ ਹੈ ਭਾਵੇਂ ਬਕਾਇਆ ਰਕਮ ਮੀਟਰ ਦੀ ਅੰਦਾਜ਼ਨ ਰੀਡਿੰਗ `ਤੇ ਹੀ ਆਧਾਰਿਤ ਕਿਉਂ ਨਾ ਹੋਵੇ, ਜਾਂ ਗੈਰ-ਬਿਜਲੀ ਚਾਰਜਾਂ ਜਾਂ ਸਕਿਉਰਟੀ ਡਿਪਾਜ਼ਿਟਾਂ ਲਈ ਹੋਵੇ।

ਆਪਣਾ ਬਿੱਲ ਦੇਣ ਦੇ ਤਰੀਕਿਆਂ ਬਾਰੇ ਜ਼ਿਆਦਾ ਜਾਣੋ।

ਲੇਟ ਪੇਮੈਂਟਾਂ ਅਤੇ ਕੋਨੈਕਸ਼ਨ ਕੱਟਣਾ

ਲੇਟ ਪੇਮੈਂਟ ਚਾਰਜ

ਤੁਹਾਡੇ ਬਿਲ `ਤੇ ਬਕਾਇਆ ਪੂਰੀ ਰਕਮ ਬਿਲ ਭੇਜਣ ਦੀ ਤਾਰੀਕ ਤੋਂ ਬਾਅਦ 21 ਦਿਨਾਂ ਦੇ ਵਿਚ ਵਿਚ ਦੇਣਯੋਗ ਹੈ।

ਜੇ ਤੁਹਾਡਾ ਭੁਗਤਾਨ ਨਾ ਕੀਤਾ ਬਕਾਇਆ $30 ਤੋਂ ਉੱਪਰ ਹੋਵੇ ਤਾਂ ਤੁਹਾਡੇ ਸਾਰੇ ਰਹਿੰਦੇ ਬਕਾਏ ਦਾ 1.5 ਪ੍ਰਤੀਸ਼ਤ ਪ੍ਰਤੀ ਮਹੀਨਾ (19.56 ਪ੍ਰਤੀਸ਼ਤ ਪ੍ਰਤੀ ਸਾਲ) ਤੁਹਾਡੇ ਖਾਤੇ ਵਿਚ ਜੋੜ ਦਿੱਤਾ ਜਾਵੇਗਾ। ਪੇਮੈਂਟ ਦੀ ਪ੍ਰੋਸੈਸਿੰਗ ਲਈ ਸਮਾਂ ਦੇਣ ਲਈ, ਲੇਟ ਪੇਮੈਂਟ ਦੇ ਅਨੁਮਾਨ ਦਾ ਚਾਰਜ ਬਿਲ ਦੀ ਤਾਰੀਕ ਤੋਂ ਬਾਅਦ 30 ਦਿਨਾਂ ਤੱਕ ਨਹੀਂ ਲੱਗਦਾ।

ਜਦੋਂ ਗਾਹਕ ਆਪਣੇ ਬਿਲ ਸਮੇਂ ਸਿਰ ਨਹੀਂ ਦਿੰਦੇ ਤਾਂ ਸਾਨੂੰ ਪੇਮੈਂਟ ਦੀਆਂ ਇਤਲਾਹਾਂ, ਲੇਟ ਹੋਈ ਆਮਦਨ, ਅਤੇ ਉਗਰਾਹੀ ਦੀ ਕਾਰਵਾਈ ਵਰਗੀਆਂ ਚੀਜ਼ਾਂ ਲਈ ਵਾਧੂ ਖਰਚੇ ਦੇਣੇ ਪੈਂਦੇ ਹਨ। ਲੇਟ ਪੇਮੈਂਟ ਦੇ ਚਾਰਜ ਇਨ੍ਹਾਂ ਵਿੱਚੋਂ ਕੁਝ ਖਰਚੇ ਵਸੂਲ ਕਰਨ ਵਿਚ ਸਾਡੀ ਮਦਦ ਕਰਦੇ ਹਨ।

ਆਪਣਾ ਖਾਤਾ ਬੰਦ ਕਰਨਾ

ਜੇ ਤੁਸੀਂ ਮੂਵ ਹੋ ਰਹੇ ਹੋਵੋ ਅਤੇ ਤੁਹਾਨੂੰ ਹੁਣ ਬਿਜਲੀ ਦੀ ਲੋੜ ਨਹੀਂ ਹੈ ਤਾਂ ਤੁਹਾਡਾ ਖਾਤਾ ਬੰਦ ਕਰਨ ਲਈ ਸਾਨੂੰ ਘੱਟੋ ਘੱਟ 24 ਘੰਟੇ ਦੇ ਨੋਟਿਸ ਦੀ ਲੋੜ ਹੈ।

ਇਸ ਨੋਟਿਸ ਦੇ ਖਤਮ ਹੋ ਜਾਣ ਤੱਕ ਤੁਸੀਂ ਆਪਣੇ ਖਾਤੇ ਨਾਲ ਜੁੜੀ ਕਿਸੇ ਵੀ ਰਕਮ ਦੀ ਪੇਮੈਂਟ ਕਰਨ ਲਈ ਜ਼ਿੰਮੇਵਾਰ ਹੋ। ਇਸ ਵਿਚ ਤੁਹਾਡੇ ਵਲੋਂ ਸਾਡੇ ਨਾਲ ਸੰਪਰਕ ਕਰਨ ਤੋਂ ਬਾਅਦ ਦੇ 24 ਘੰਟਿਆਂ ਵਿਚ ਵਰਤੀ ਗਈ ਬਿਜਲੀ ਅਤੇ ਇਸ ਦੇ ਨਾਲ ਨਾਲ ਕੋਈ ਵੀ ਉਹ ਖਰਚੇ ਸ਼ਾਮਲ ਹਨ ਜਿਹੜੇ ਟੁੱਟੀਆਂ ਤਾਰਾਂ, ਮੀਟਰ (ਮੀਟਰਾਂ) ਜਾਂ ਸਾਡੇ ਹੋਰ ਕਿਸਮਾਂ ਦੇ ਸਾਜ਼-ਸਾਮਾਨ ਨੂੰ ਹੋਏ ਨੁਕਸਾਨ ਨਾਲ ਸੰਬੰਧਿਤ ਹੁੰਦੇ ਹਨ।

ਮੀਟਰ ਪੜ੍ਹਣਾ

ਸਾਡੇ ਬਹੁਤੇ ਮੀਟਰ, ਤੁਹਾਡੇ ਵਲੋਂ ਵਰਤੀ ਗਈ ਬਿਜਲੀ ਦੀ ਜਾਣਕਾਰੀ ਆਪਣੇ ਆਪ ਹੀ ਦਿਨ ਵਿਚ ਤਿੰਨ ਵਾਰੀ ਸਾਨੂੰ ਵਾਪਸ ਭੇਜਦੇ ਹਨ।

ਥੋੜ੍ਹੇ ਜਿਹੇ ਆਮ ਮੀਟਰ ਅਜੇ ਵੀ ਆਪ ਆ ਕੇ ਪੜ੍ਹੇ ਜਾਂਦੇ ਹਨ। ਇਸ ਦੇ ਇਲਾਵਾ, ਜਿਹੜੇ ਗਾਹਕ ਮੀਟਰ ਦੀਆਂ ਚੋਣਾਂ ਦੇ ਪ੍ਰੋਗਰਾਮ ਵਿਚ ਗਏ ਹਨ (ਰੇਡਿਓ-ਔਫ ਅਤੇ ਲੈਗੇਸੀ ਮੀਟਰ) ਉਨ੍ਹਾਂ ਦੇ ਮੀਟਰ ਵੀ ਹਰ ਦੋ ਮਹੀਨਿਆਂ ਬਾਅਦ ਆ ਕੇ ਪੜ੍ਹੇ ਜਾਂਦੇ ਹਨ।

ਕਿਰਪਾ ਕਰਕੇ ਇਹ ਪੱਕਾ ਕਰੋ ਕਿ ਸਾਡੇ ਮੀਟਰਾਂ ਅਤੇ ਸਾਡੇ ਸਾਜ਼-ਸਾਮਾਨ ਤੱਕ ਸਾਡੀ ਸੁਰੱਖਿਅਤ ਅਤੇ ਨਿਰਵਿਘਨ ਪਹੁੰਚ ਹੈ।

ਮੀਟਰ ਦੀ ਅੰਦਾਜ਼ਨ ਪੜ੍ਹਤ

ਜੇ ਅਸੀਂ ਤੁਹਾਡਾ ਮੀਟਰ ਪੜ੍ਹਨ ਦੇ ਯੋਗ ਨਾ ਹੋਈਏ ਤਾਂ ਬਿਲ ਲਈ ਅੰਦਾਜ਼ਨ ਰਕਮ ਵਰਤੀ ਜਾ ਸਕਦੀ ਹੈ। ਇਕ ਸੁਨੇਹਾ – “ਤੁਹਾਡਾ ਬਿਲ ਇਕ ਅੰਦਾਜ਼ਾ ਹੈ” ਤੁਹਾਡੇ ਬਿਲ ਉਪਰ ਲਿਖਿਆ ਹੋਵੇਗਾ। ਜਦੋਂ ਅਸੀਂ ਤੁਹਾਡਾ ਬਿਲ ਪੜ੍ਹਨ ਦੇ ਯੋਗ ਹੋ ਜਾਈਏ ਤਾਂ ਬਿਜਲੀ ਦੀ ਅਸਲੀ ਵਰਤੋਂ ਦਿਖਾਉਣ ਲਈ ਤੁਹਾਡੇ ਖਾਤੇ ਉੱਪਰ ਅਡਜਸਟਮੈਂਟ ਕੀਤੀ ਜਾਵੇਗੀ।

ਬਿਜਲੀ ਦੇ ਮੀਟਰਾਂ ਬਾਰੇ ਜ਼ਿਆਦਾ ਜਾਣੋ।

ਤੁਹਾਡੀ ਪ੍ਰਾਪਰਟੀ ਉੱਪਰ ਸਾਜ਼-ਸਾਮਾਨ

ਪ੍ਰਾਪਰਟੀ ਦਾ ਮਾਲਕ ਸਹੀ ਤਾਰਾਂ ਅਤੇ ਫਿਟਿੰਗਜ਼ ਪ੍ਰਦਾਨ ਕਰਨ ਲਈ ਜ਼ਿੰਮੇਵਾਰ ਹੈ ਜਿਹੜੀਆਂ ਬਿਜਲੀ ਨਾਲ ਸੰਬੰਧਿਤ ਕੋਡ ਜਾਂ ਮਿਊਂਨਿਸਪਲ ਬਾਈਲਾਜ਼ ਦੀ ਪਾਲਣਾ ਕਰਦੀਆਂ ਹੋਣ ਤਾਂ ਜੋ ਅਸੀਂ ਬਿਜਲੀ ਦੀ ਸਰਵਿਸ ਦੇ ਸਕੀਏ।

ਪ੍ਰਾਪਰਟੀ ਦਾ ਮਾਲਕ ਇਹ ਚੀਜ਼ਾਂ ਪ੍ਰਦਾਨ ਕਰਨ ਅਤੇ ਇਨ੍ਹਾਂ ਦੀ ਸੰਭਾਲ ਕਰਨ ਲਈ ਜ਼ਿੰਮੇਵਾਰ ਹੈ:

• ਇਨਸੂਲੇਟਰ ਨਾਲ ਆਰ ਪਾਰ ਬੋਲਟ ਵਾਲਾ ਕਲੈਵਿਸ
• ਵੈਦਰ ਹੈੱਡ (ਜਿਸ ਨੂੰ ਗੂਸਨੈੱਕ ਵੀ ਆਖਿਆ ਜਾਂਦਾ ਹੈ)
• ਨਾਲੀ (ਜਿਸ ਨੂੰ ਹਾਊਸ ਪਾਈਪ, ਸਰਵਿਸ ਮਾਸਟ ਵੀ ਆਖਿਆ ਜਾਂਦਾ ਹੈ)
• ਮੀਟਰ ਬੇਸ
• ਤੁਹਾਡੀ ਪ੍ਰਾਪਰਟੀ ਦੇ ਅੰਦਰ ਸਾਰੀਆਂ ਤਾਰਾਂ

ਅਸੀਂ ਬਿਜਲੀ ਦੇ ਅੱਗੇ ਲਿਖੇ ਸਾਜ਼-ਸਾਮਾਨ ਦੇ ਮਾਲਕ ਹਾਂ ਅਤੇ ਇਨ੍ਹਾਂ ਲਈ ਜ਼ਿੰਮੇਵਾਰ ਹਾਂ:

• ਬਿਜਲੀ ਦੇ ਮੀਟਰ
• ਬੀ ਸੀ ਹਾਈਡਰੋ ਦੇ ਬਿਜਲੀ ਦੇ ਖੰਭੇ
• ਤਾਰਾਂ
• ਕੇਬਲਾਂ

ਤੁਹਾਡੀ ਸਰਵਿਸ ਨੂੰ ਕਾਇਮ ਰੱਖਣ ਲਈ ਸਾਨੂੰ ਤੁਹਾਡੇ ਮੀਟਰਾਂ ਅਤੇ ਸਾਜ਼-ਸਾਮਾਨ ਤੱਕ ਸੁਰੱਖਿਅਤ ਅਤੇ ਨਿਰਵਿਘਨ ਪਹੁੰਚ ਦੀ ਲੋੜ ਹੈ।

ਸਾਡੇ ਨਾਲ ਸੰਬੰਧਿਤ ਸਾਰਾ ਸਾਜ਼-ਸਾਮਾਨ ਬੀ ਸੀ ਹਾਈਡਰੋ ਦੀ ਪ੍ਰਾਪਰਟੀ ਰਹਿੰਦਾ ਹੈ ਭਾਵੇਂ ਇਹ ਤੁਹਾਡੀ ਪ੍ਰਾਪਰਟੀ `ਤੇ ਹੀ ਹੋਵੇ, ਅਤੇ ਇਸ ਨੂੰ ਸਾਡੀ ਲਿਖਤੀ ਆਗਿਆ ਬਿਨਾਂ ਮੂਵ ਨਹੀਂ ਕੀਤਾ ਜਾ ਸਕਦਾ ਜਾਂ ਹਟਾਇਆ ਨਹੀਂ ਜਾ ਸਕਦਾ।

ਬਿਜਲੀ ਬਹੁਤ ਹੀ ਜ਼ਿਆਦਾ ਖਤਰਨਾਕ ਹੋ ਸਕਦੀ ਹੈ। ਆਪਣੀ ਸੇਫਟੀ ਅਤੇ ਲੋਕਾਂ ਅਤੇ ਸਾਡੇ ਮੁਲਾਜ਼ਮਾਂ ਦੀ ਸੇਫਟੀ ਲਈ, ਕਿਰਪਾ ਕਰਕੇ ਸਾਡੇ ਸਾਜ਼-ਸਾਮਾਨ ਉੱਪਰ ਕੋਈ ਕੰਮ ਕਰਨ ਦੀ ਕੋਸ਼ਿਸ਼ ਨਾ ਕਰੋ। ਇਸ ਵਿਚ ਉਨ੍ਹਾਂ ਦਰੱਖਤਾਂ ਜਾਂ ਚੀਜ਼ਾਂ ਨੂੰ ਹਟਾਉਣਾ ਵੀ ਸ਼ਾਮਲ ਹੈ ਜਿਹੜੀਆਂ ਤਾਰਾਂ ਜਾਂ ਖੰਭਿਆਂ ਉੱਪਰ ਡਿਗੀਆਂ ਜਾਂ ਨੇੜੇ ਉੱਗ ਰਹੀਆਂ ਹੋ ਸਕਦੀਆਂ ਹਨ। ਸਾਡੇ ਸਿਸਟਮ ਨਾਲ ਕੋਨੈਕਸ਼ਨ ਕਰਨ ਅਤੇ ਕੋਨੈਕਸ਼ਨ ਕੱਟੇ ਜਾਣ ਦਾ ਕੰਮ ਸਾਡੇ ਅਮਲੇ ਅਤੇ ਸਾਡੇ ਠੇਕੇਦਾਰਾਂ ਵਲੋਂ ਹੀ ਕੀਤਾ ਜਾਣਾ ਜ਼ਰੂਰੀ ਹੈ। ਤੁਹਾਡੀ ਪ੍ਰਾਪਰਟੀ ਨੂੰ ਸਰਵਿਸ ਦੇ ਰਹੇ ਸਾਜ਼-ਸਾਮਾਨ ਉੱਪਰ ਜਾਂ ਇਸ ਦੇ ਨੇੜੇ ਜੇ ਕੋਈ ਕੰਮ ਕਰਨ ਦੀ ਲੋੜ ਹੋਵੇ ਤਾਂ ਸਾਡੇ ਨਾਲ ਸੰਪਰਕ ਕਰੋ।

ਬਿਜਲੀ ਦੇ ਕੋਨੈਕਸ਼ਨਾਂ ਬਾਰੇ ਜ਼ਿਆਦਾ ਜਾਣੋ।

ਸਾਡੀ ਜ਼ਿੰਮੇਵਾਰੀ ਅਤੇ ਤੁਹਾਡੀ ਸਰਵਿਸ ਦਾ ਕੋਨੈਕਸ਼ਨ ਕੱਟਣ ਜਾਂ ਆਰਜ਼ੀ ਤੌਰ `ਤੇ ਬੰਦ ਕਰਨ ਦਾ ਸਾਡਾ ਹੱਕ

ਤੁਹਾਨੂੰ ਇਕਸਾਰ ਅਤੇ ਨਿਰਵਿਘਨ ਸਰਵਿਸ ਦੇਣ ਲਈ ਅਸੀਂ ਸਖਤ ਮਿਹਨਤ ਕਰਦੇ ਹਾਂ ਪਰ ਅਸੀਂ ਬਿਜਲੀ ਦੀ ਲਗਾਤਾਰ ਸਪਲਾਈ ਜਾਂ ਫ੍ਰੀਕੂਐਂਸੀ ਜਾਂ ਵੋਲਟੇਜ ਦੇ ਕਾਇਮ ਰਹਿਣ ਦੀ ਗਰੰਟੀ ਨਹੀਂ ਦਿੰਦੇ। ਇਸ ਕਰਕੇ, ਸਾਨੂੰ ਕਿਸੇ ਨੁਕਸਾਨ ਲਈ ਜ਼ਿੰਮੇਵਾਰ, ਸੱਟ, ਨੁਕਸਾਨ ਜਾਂ ਖਰਚੇ ਲਈ ਜ਼ਿੰਮੇਵਾਰ ਨਹੀਂ ਠਹਿਰਾਇਆ ਜਾ ਸਕਦਾ, ਜਿਸ ਵਿਚ ਨਫੇ ਦਾ ਨੁਕਸਾਨ, ਆਮਦਨ ਦਾ ਨੁਕਸਾਨ ਜਾਂ ਹੋਰ ਆਰਥਿਕ ਨੁਕਸਾਨ ਵੀ ਸ਼ਾਮਲ ਹਨ, ਜਿਹੜੇ ਬਿਜਲੀ ਦੀ ਸਪਲਾਈ ਵਿਚ ਵਿਘਨ ਜਾਂ ਨੁਕਸ ਕਰਕੇ ਹੋਏ ਹੋ ਸਕਦੇ ਹਨ।

ਅਸੀਂ ਕਿਸੇ ਵੇਲੇ ਵੀ, ਚੋਰੀ ਜਾਂ ਫਰਾਡ ਰੋਕਣ ਲਈ, ਸਾਡੀ ਪ੍ਰਾਪਰਟੀ ਦੀ ਰੱਖਿਆ ਕਰਨ ਲਈ ਜਾਂ ਹੋਰ ਗਾਹਕਾਂ ਨੂੰ ਸਾਡੀ ਸਰਵਿਸ ਦੀ ਰੱਖਿਆ ਕਰਨ ਲਈ ਤੁਹਾਡੀ ਸਰਵਿਸ ਰੋਕ ਜਾਂ ਖਤਮ ਕਰ ਸਕਦੇ ਹਾਂ। ਅਸੀਂ ਤੁਹਾਡਾ ਕੋਨੈਕਸ਼ਨ ਤਾਂ ਵੀ ਕੱਟ ਸਕਦੇ ਹਾਂ ਜੇ ਤੁਸੀਂ ਸਾਡੇ ਸਰਵਿਸ ਐਗਰੀਮੈਂਟ ਦੀਆਂ ਸ਼ਰਤਾਂ ਦੀ ਪਾਲਣਾ ਕਰਨ ਵਿਚ ਫੇਲ੍ਹ ਹੁੰਦੇ ਹੋ, ਜਾਂ ਜੇ ਸਾਨੂੰ ਕੋਈ ਸਰਕਾਰੀ ਵਿਭਾਗ ਤੁਹਾਡੀ ਸਰਵਿਸ ਰੋਕਣ ਜਾਂ ਖਤਮ ਕਰਨ ਦਾ ਆਰਡਰ ਕਰਦਾ ਹੈ।

ਬਿਜਲੀ ਦੀ ਸਰਵਿਸ ਸੇਫਟੀ ਦੇ ਕਾਰਨਾਂ ਕਰਕੇ, ਸਾਡੇ ਸਿਸਟਮ ਵਿਚ ਰਿਪੇਅਰਾਂ ਜਾਂ ਸੁਧਾਰ ਕਰਨ ਲਈ, ਜਾਂ ਕੋਈ ਅੱਗ ਲੱਗਣ, ਹੜ੍ਹ ਆਉਣ ਜਾਂ ਕਿਸੇ ਹੋਰ ਐਮਰਜੰਸੀ ਵਿਚ ਆਰਜ਼ੀ ਤੌਰ `ਤੇ ਬੰਦ ਕੀਤੀ ਜਾ ਸਕਦੀ ਹੈ। ਜਦੋਂ ਵੀ ਵਿਹਾਰਕ ਹੋਵੇ, ਅਸੀਂ ਬਿਜਲੀ ਦੇ ਬੰਦ ਹੋਣ ਦਾ ਨੋਟਿਸ ਦਿਆਂਗੇ ਅਤੇ ਜਿੰਨਾ ਵੀ ਛੇਤੀ ਹੋ ਸਕੇ ਸਰਵਿਸ ਦੁਬਾਰਾ ਚਾਲੂ ਕਰਾਂਗੇ।

ਸ਼ਿਕਾਇਤਾਂ

ਜੇ ਸਾਡੇ ਵਲੋਂ ਤੁਹਾਨੂੰ ਦਿੱਤੀ ਜਾ ਰਹੀ ਸਰਵਿਸ ਬਾਰੇ ਤੁਹਾਡਾ ਕੋਈ ਮਤਭੇਦ ਹੋਵੇ ਤਾਂ ਕਿਰਪਾ ਕਰਕੇ ਸਾਡੇ ਨਾਲ ਸੰਪਰਕ ਕਰੋ ਤਾਂ ਜੋ ਤੁਹਾਡੀ ਸ਼ਿਕਾਇਤ ਦਾ ਹੱਲ ਕਰਨ ਲਈ ਅਸੀਂ ਹਰ ਕੋਸ਼ਿਸ਼ ਕਰ ਸਕੀਏ।

ਸਾਨੂੰ ਬ੍ਰਿਟਿਸ਼ ਕੋਲੰਬੀਆ ਯੂਟਿਲਟੀਜ਼ ਕਮਿਸ਼ਨ (ਬੀ ਸੀ ਯੂ ਸੀ) ਵਲੋਂ ਨਿਯਮਬੱਧ ਕੀਤਾ ਜਾਂਦਾ ਹੈ ਅਤੇ ਯੂਟਿਲਟੀਜ਼ ਕਮਿਸ਼ਨ ਐਕਟ ਹੇਠ ਬੀ ਸੀ ਯੂ ਸੀ ਦੀਆਂ ਜ਼ਿੰਮੇਵਾਰੀਆਂ ਵਿਚ ਇਹ ਪੱਕਾ ਕਰਨਾ ਸ਼ਾਮਲ ਹੈ ਕਿ ਗਾਹਕਾਂ ਨੂੰ ਇਸ ਦੇ ਨਿਯਮਾਂ ਹੇਠਲੀਆਂ ਯੂਟਿਲਟੀਜ਼ ਤੋਂ ਵਾਜਬ ਰੇਟਾਂ `ਤੇ ਸੁਰੱਖਿਅਤ, ਭਰੋਸੇਯੋਗ ਅਤੇ ਬਿਨਾਂ ਵਿਤਕਰੇ ਤੋਂ ਐਨਰਜੀ ਦੀਆਂ ਸੇਵਾਵਾਂ ਮਿਲਣ। ਜੇ ਅਸੀਂ ਤੁਹਾਡੀ ਸੰਤੁਸ਼ਟੀ ਮੁਤਾਬਕ ਤੁਹਾਡੀ ਸ਼ਿਕਾਇਤ ਦਾ ਹੱਲ ਨਾ ਕਰੀਏ ਤਾਂ ਤੁਹਾਡੇ ਕੋਲ ਬੀ ਸੀ ਯੂ ਸੀ ਕੋਲ ਸ਼ਿਕਾਇਤ ਦਰਜ ਕਰਵਾਉਣ ਦਾ ਹੱਕ ਹੈ।

ਓਮਬਡਜ਼ਪਰਸਨ ਦਾ ਦਫਤਰ ਇਕ ਆਜ਼ਾਦ ਦਫਤਰ ਹੈ ਜਿਹੜਾ ਇਹ ਪੜਤਾਲਾਂ ਕਰਦਾ ਹੈ ਕਿ ਕੀ ਸੂਬੇ ਦੀਆਂ ਜਨਤਕ ਅਥਾਰਟੀਆਂ, ਜਿਨ੍ਹਾਂ ਵਿਚ ਬੀ ਸੀ ਹਾਈਡਰੋ ਵੀ ਸ਼ਾਮਲ ਹੈ, ਮੁਨਾਸਬ ਤੌਰ `ਤੇ ਅਤੇ ਵਾਜਬ ਤੌਰ `ਤੇ ਕੰਮ ਕਰ ਰਹੀਆਂ ਹਨ ਕਿ ਨਹੀਂ। ਜੇ ਤੁਸੀਂ ਇਹ ਯਕੀਨ ਕਰਦੇ ਹੋਵੋ ਕਿ ਅਸੀਂ ਤੁਹਾਡੇ ਨਾਲ ਨਾਵਾਜਿਬ ਤਰੀਕੇ ਨਾਲ ਵਰਤਾਉ ਕੀਤਾ ਹੈ ਤਾਂ ਤੁਹਾਡੇ ਕੋਲ ਸ਼ਿਕਾਇਤ ਦਰਜ ਕਰਵਾਉਣ ਦੀ ਚੋਣ ਹੈ।

ਜੇ ਤੁਹਾਨੂੰ ਸਾਡੇ ਨਾਲ ਸੰਪਰਕ ਕਰਨ ਦੀ ਲੋੜ ਹੈ ਅਤੇ ਤੁਸੀਂ ਅੰਗਰੇਜ਼ੀ ਵਿਚ ਗੱਲ ਕਰਨ ਲਈ ਆਰਾਮਦੇਹ ਨਾ ਮਹਿਸੂਸ ਕਰਦੇ ਹੋਵੋ ਤਾਂ ਮੰਗ ਕਰਨ `ਤੇ ਬੀ ਸੀ ਹਾਈਡਰੋ ਅਨੁਵਾਦ ਦੀ ਸਰਵਿਸ ਦੇਵੇਗੀ।